越是努力忘記，越是無法忘記...
其實根本就無努力忘記呢回事。你越提醒自己去忘記，你腦裏面其實就不斷重複地"溫習"，最後變成越是努力忘記越是記得深刻。
曾經同上一個男友吵大交之後，心裏突然對呢段感情起第一次猶豫，於是我唔知點解突然喺手機note寫低咗我同佢之間嘅問題同一啲原來我一直都唔係太鍾意佢嘅行為。幾個月後因為突然殺出第三者所以分手，當時我每日瞓唔安食唔落...開始覺得一定係自己唔夠小三好，自己開始不斷問自己問題想搵答案，如果當初我肯放低多啲工作搵多啲時間倍佢就可能唔會搞成咁樣等等，之後亦開始重複又重複咁回憶過去究竟我邊度做得唔夠好，又覺得唔可能再搵到下一個差唔多嘅男人...根本愈話唔諗就越想諗！
直到有一日無意㯲手機比我睇番個note，突然好似有個人(其實係自己)點醒咗我咁！我驚覺原來我曾經可以好冷靜咁喺高處望返呢段感情，可以理智咁分析當下狀況。好多時當一段關係喺愛情嘅跑道上跑得耐，「包容」對方嘅不足好容易變咗呢段感情嘅生存模式，最後習慣咗佢嘅唔好，亦同時會忘記咗自己追求一段感情嘅初衷。所謂事出必有因，抽離一下呢段感情諗諗你就會將大惡魔「唔甘心」先生趕走令你如釋重負慢慢抒懷。
有時強迫自己去忘記，例如死都唔會再去以前去過嘅地方或者餐廳等等，反而會變得更執著。有時候你需要embrace傷痛，喺邊度跌倒就喺邊度起翻身。每個人由傷心到痊愈需要嘅時間長短不一，但係我好肯定對於分手嘅痛苦同對前任嘅留戀係會隨著時間而變淡(除非你自己死都唔肯let go，咁神都幫唔到你....亦唔好同自己講“我真係忘記唔到佢啊“嗰D無營養嘅說話，你日日同自己講話做唔到打晒輸數，咁點都一定做唔到啦！)。若果心理狀況唔穩定，不妨將注意力轉向其他嘅事，搵多啲朋友多多充實自己，自然就再會減低自己亂諗嘢嘅時間。總之唔好心急，順其自然嘅話就會慢慢釋懷。
忘不了就不忘，不忘自然就忘。順其自然，將過去嘅經驗好好活用喺下一段戀情就好。要記住時間會證明一切，前面一定有有更好的人和事正在等著妳。
共勉之。
#分咗手就向前望 #不吃回頭草 #下個一定更好 #女人像鹽
Search